சரியான பூஜை முறைகள் மற்றும் வீட்டில் தெய்வங்களை வைக்கும் முறைகள்

சரியான பூஜை முறைகள் மற்றும் வீட்டில் தெய்வங்களை வைக்கும் முறைகளைப் பற்றி தெரிந்து கொள்வோம்.

பூஜை செய்யும்போது, பூஜை செய்பவர் தெற்கு திசையை நோக்கி அமர்வதைத் தவிர்க்க வேண்டும். தெய்வப் படங்களை கிழக்கு திசை பார்த்து வைப்பது உகந்தது. தெற்கு திசை பார்த்து படங்களை வைக்கக்கூடாது. கிழக்கு திசையில் வைக்க இயலாதபட்சத்தில், தெற்கு திசையைத் தவிர மற்ற திசைகளில் வைக்கலாம். பூஜை அறையில் சிலைகளை வைக்கும்போது, அவற்றுக்கு இடையே போதுமான இடைவெளி விட்டு வைக்க வேண்டும்.

நிவேதனம் செய்யும் போது சில விஷயங்களைக் கவனத்தில் கொள்ள வேண்டும். நிவேதனம் செய்த தேங்காயை, மீண்டும் சமையலில் பயன்படுத்தி, மறுபடியும் நிவேதனம் செய்யக்கூடாது. எவர்சில்வர் பாத்திரங்களில் நேரடியாக நைவேத்தியம் படைக்காமல், ஓர் இலையின் மீது வைத்துப் படைப்பது சிறந்தது.

வீட்டில் கோலம் போடாமலும், விளக்கு ஏற்றாமலும் கோயிலுக்குச் செல்வது முறையல்ல. மேலும், எரியும் விளக்கின் சுடரைத் தொட்டு வணங்குவதோ அல்லது தலையில் தடவிக் கொள்வதோ கூடாது.

இதையும் படிக்கலாமே:
கடவுளுக்கு படைக்கப்படும் பாரம்பரிய பிரசாதங்கள் 
https://astrologytamil.in/some-traditional-offerings-offered-during-puja/

வீட்டின் வாசலில் ஸ்வஸ்திக், ஸ்ரீ சக்கரம், ஓம் மற்றும் திரிசூலம் போன்ற மங்கள சின்னங்களை ஒட்டி வைப்பது நல்லது. மேலும், வெளியே செல்லும் போது இந்த சின்னங்களை சட்டைப் பையில் வைத்துக் கொள்வதும் நன்மை பயக்கும்.

பூஜை அறையில் சுவாமி படங்களுக்கு வாடிய அல்லது உலர்ந்த பூக்களைச் சூட்டி வைக்கக்கூடாது. சிரிக்கும் புத்தர் சிலையை வீட்டின் வாசலுக்கு நேர் எதிரே வைப்பது அதிர்ஷ்டத்தைத் தரும் என்று நம்பப்படுகிறது.